Македонскиот филм „М“ на режисерот Вардан Тозија, во продукција на „Фокус покус филмс“, ја освои наградата за Најдобар интернационален филм на 16. издание на филмскиот фестивал „Ноќ на хоророт“, одржан во Висконсин, САД.

По повеќе од една декада одржување на овој престижен жанровски фестивал во Мелбурн и Сиднеј, Австралија, неговото седиште се префрли во САД.

Жирито го опиша „М“ како „чудесно остварување, трогателна драма за созревање сместена во дистописки кошмар од Вардан Тозија, на кого се доделува наградата за Најдобар интернационален филм“.

„М“ ќе има нови две премиери овој месец – во официјалните селекции на еден од најголемите балкански фестивали, Интернационалниот филмски фестивал во Софија, и „Фантаспоа“, еден од водечките жанровски фестивали на Латинска Америка, што ќе се одржи во Порто Алегре, Бразил.