Академијата за филмски уметности и науки покани 529 нови членови, со што дополнително се проширува гласачкото тело кое ги одлучува добитниците на Оскар.

Меѓу поканетите се познати имиња од филмската индустрија, вклучувајќи ги Џена Ортега, Џејкоб Елорди, Тејана Тејлор, Џош О’Конор, Сима Лиу, како и режисерите и авторите Џош и Бени Сафди, пренесуваат странските медиуми.

Доколку сите поканети го прифатат членството, Академијата ќе има вкупно 11.319 членови, од кои 10.338 се гласачи. Пред десет години, во 2016 година, бројот на членови беше околу 6.000.

Академијата значително го прошири своето членство во последните години како дел од напорите за зголемување на различноста.

Така, во 2015 година, организацијата беше составена од 75 проценти мажи и 92 проценти белци, што доведе до критики и започнување на кампањата „OscarsSoWhite“ истата година откако сите номинирани за актери беа белци.

По новите приеми, Академијата ќе биде составена од околу 64 проценти мажи и 75 проценти белци, додека членовите надвор од САД сега сочинуваат околу 22 проценти, според податоците.

Според соопштението на Академијата, изборот на нови членови се базира на професионални квалификации, со постојан фокус на вклучување, еднаквост и застапеност.

Во новата група членови, 42 проценти се жени, 56 проценти доаѓаат од недоволно застапени заедници, додека 53 проценти од членовите доаѓаат надвор од САД.

Во последните години, Академијата постепено го зголемуваше бројот на членови, а минатата година се приклучија 534 нови гласачи.

Како што се шири, Академијата воведува нови категории на награди. Оваа година, за првпат беше доделена награда за кастинг, додека награда за достигнувања во каскадерството ќе биде воведена во 2028 година.

Меѓу новите членови се и Ентони Рамос, Бил Скарсгард, Миа Гот, Џон Бернтал, Џемејн Клемент, Сопе Дирису и Стивен Фрај, додека меѓу режисерите, покана добија Зак Крегер и Оливер Лакс.

Доделувањето на Оскарите ќе се одржи на 14 март 2027 година, а Конан О’Брајан ќе биде водител третпат по ред.

„Една битка по друга“ триумфираше на Оскарите со шест статуетки, Мајкл Б. Џордан и Џеси Бакли меѓу најголемите победници