Австријците генерално имаат поголема доверба во сопствената финансиска состојба отколку граѓаните во многу други земји, покажува новото истражување на платформата за штедење „Рајзин“.

Иако високите трошоци за живот и натаму се главен извор на грижи, голем дел од испитаниците сметаат дека успешно ги контролираат личните финансии и можат да ги планираат своите расходи. Во исто време, компанијата најавува амбициозни планови за проширување на австрискиот пазар и воведување нови производи за штедење.

Според резултатите од анкетата, Австрија се наоѓа во горниот дел од европската листа кога станува збор за финансиска самодоверба.

Истражувањето е спроведено меѓу повеќе од 11.000 испитаници во 11 земји, а Австрија се пласира на петтото место. И покрај бројните економски предизвици во последните години, многу граѓани веруваат дека успешно управуваат со своите приходи и расходи.

Сепак, под површината остануваат присутни и значителни стравувања поврзани со секојдневните трошоци, инфлацијата и со можноста за долгорочно финансиско обезбедување.

Секојдневните трошоци остануваат главна грижа

Истражувањето покажува дека покривањето на тековните животни трошоци е најважниот финансиски приоритет за Австријците.

Дури 73,5 проценти од испитаниците ги посочуваат храната, домувањето, енергијата и другите секојдневни расходи како една од трите најважни теми во нивниот финансиски живот. Ова укажува дека, и покрај релативно високото ниво на финансиска сигурност, цените и натаму имаат силно влијание врз домашните буџети.

Речиси половина од испитаниците, 46,3 проценти, изјавиле дека чувствуваат силен или значителен стрес поврзан со личните финансии. Сепак, овој процент е понизок од мегународниот просек, што покажува дека состојбата во Австрија е нешто постабилна отколку во голем број други земји.

Особено изложени на финансиски притисок се помладите лица и жените, категории кои почесто пријавуваат загриженост за сопствената економска иднина.

На врвот на листата според финансиска самодоверба се Холандија, Германија, Шпанија и Полска. Австрија се наога веднаш зад нив, што потврдува дека граѓаните во земјата генерално имаат позитивен поглед кон сопствената финансиска состојба.

Но, истражувањето покажува и дека чувството на сигурност не секогаш значи и реален напредок во остварувањето на финансиските цели.

Штедењето и сигурноста добиваат сѐ поголемо значење

Втората најважна финансиска цел за Австријците е создавањето парични резерви за непредвидени ситуации.

Дури 67,3 проценти од испитаниците го наведуваат создавањето заштеда како една од трите клучни цели. Тоа е над меѓународниот просек и покажува дека потребата од сигурност и финансиска стабилност има особено важно место во австриското општество.

Повеќе од половина од испитаниците, 52,6 проценти, изјавиле дека долгорочното создавање богатство е меѓу нивните најважни финансиски приоритети. Истовремено, 27,6 проценти сметаат дека можат со голема сигурност да ги планираат своите финансии во следните 12 месеци. Но зад овој оптимизам се крие одреден јаз меѓу очекувањата и реалноста. Над 41 процент од анкетираните признале дека во текот на изминатата година постигнале мал или никаков напредок во исполнувањето на сопствените финансиски цели.

Во вакви околности, платформата „Рајзин“ гледа можност за понатамошен раст на австрискиот пазар.

Компанијата им овозможува на клиентите да вложуваат средства во штедни производи на банки од различни европски држави, со цел да добијат поповолни каматни стапки.

Во август се очекува и воведување нова понуда за дневно штедење, а раководството најавува раст на бројот на корисници во Австрија во двоцифрен процент.

Според компанијата, интересот за штедење останува висок, особено во време кога многу грагани бараат начини подобро да ги заштитат своите заштеди од економските неизвесности.