Унгарија ќе мора да изгради барем еден мал модуларен реактор (СМР), покрај планираното проширување на нуклеарната централа Пакс, изјави унгарскиот министер за енергетика Чабе Лантос.

„Ние би ги добиле најрано во 2029 или 2030 година и мислам дека локацијата не треба да биде Пакс, туку дел од Унгарија каде побарувачката за енергија расте“, изјави Лантос.

СМР може да произведе до 300 мегавати електрична енергија. „Бидејќи се помали, може да се постават покрај реки со послаб проток на вода или да се градат со разладни кули“, додаде министерот.

Тој не ја исклучи можноста за купување модуларен реактор од Русија. „Мораме да ја разгледаме секоја опција“, рече тој. Во 2014 година Унгарија потпиша договор вреден 12,5 милијарди евра со руската нуклеарна компанија Росатом за изградба на два реактори од 1,2 гигавати во Пакс, кој веќе има четири реактори.

Но, Пакс 2 доцни. Лантос, исто така, рече дека потрошувачката на енергија во Унгарија во 2030 година треба да изнесува 60 терават-часови (TWh), а не 66 терават-часови, како што се предвидуваше досега. Во 2022 година таа изнесуваше 43 терават-часови.