Убедливиот пораз од Германија ги однесе ракометарките во натпревар за 11 место на СП
Женската кадерска репрезентција на Македонија доживеа убедлив пораз од Германија од 21:34 и утре ќе игра за 11 место на Светското првенство до 18 години што се одржува во Скопје.
Ракометарките кои во претходниот натпревар против Исланд пропуштија шанса да обезбедат пласман во четвртфиналето, на денешниот натпревар влегоа емотивно испразнети и уште од самиот почеток им дозволија на Германките да наметнат свој ритам и да го контролираат резултатот.
Натпреварот започна со водство од 4:1 за Германија, а потоа беше и плус пет (8:3), но по тај-аутот на селекторот Љубомир Савевски, македонските ракометарки заиграа далеку подобро и успеаја да дојдат до минус еден (10:9). Сепак во финишот од првиот дел, Германија повторно влезе во серија и на одмор замина со предност од пет гола (17:12).
И второто полувреме започна слично како и првото, Германија тргна со серија 3:1 за плус седум (20:13), а потоа дојдоа и до двоцифрена предност (26:16) по што единствена непознаница до крајот на натпреварот беше со колкава разлика ќе загуби Македонија.
На крајот Германките славеа со 34:21 и ја испратија Македонија на дуел со Хрватска за пласман на 11 место на СП.
Емилијана Ризоска и Теодора Дукоска дадоа по четири гола, додека по три погодоци имаа Борјана Коцева и Ива Младеновска, а голманката Чурлиновска имаше десет одбрани.