Уапсен жител на Злетово, со пушка го ранил пријателот во лов
Ловџија од Злетово бил уапсен вчера, откако во близина на пробиштипското село Лесново, со пушка го ранил пријателот со кој бил во лов, соопшти полицијата.
„На 08.12.2022, полициски службеници од Полициската станица Пробиштип го лишиле од слобода Г.И.(37) од с.Злетово, пробиштипско, затоа што околу 13.30 часот во атар на с.Лесново, пробиштипско, на место викано Голак, додека биле на лов со Ј.К.(56) од с.Злетово, го повредил со ловечка пушка“, се вели во полицискиот билтен.
Пушката била одземена за понатамошна постапка, а повредениот бил пренесен во Клиничка болница Штип за укажување лекарска помош. По целосно документирање на случајот ќе следува соодветна пријава, додаваат од МВР.