Полицијата во северозападниот дел на Пакистан уапси маж кој е осомничен за убиство на две тинејџерки „за заштита на честа“ откако на социјалните мрежи се појави нивно видео во друштво на момче како ги бакнува.

Осомничениот Мохамад Аслам е, роднина на младите девојки на возраст од 16 и 18 години, кои минатата недела се убиени во регионот Северен Вазиристан, на границата со Авганистан, изјави полицискиот службеник Мохамед Ибрахим.

Најмалку четворица мажи, меѓу кои е и таткото на едната и братот на другата девојка, веќе се во полициски притвор и признаа дека се вмешани во убиството на девојките, наведе полицијата.

Се верува дека причина за убиството е кратко видео објавено на социјалните мрежи на кое момчето на отворено ги бакнува трите девојки. Регионот во кој се случи убиството инаку е прибежиште на Ал Каеда и талибанците.

Третата девојка од видеото е жива и спасена, наведоа до полицијата.

Секоја година околу 1.000 жени во Пакистан се убиени во таканаречени „убиства заради чест“ поради тоа што ги „посрамиле“ семејствата, наведуваат здруженијата за човекови права.

Претходно оваа недела владини официјални лица и активисти објавија дека дошло до значајно зголемување на бројот на „убиства од чест“, а причина за тоа се семејните несогласувања кои избивале во услови на карантин поради коронавирусот.

Пакистан многу лошо стои на скалата на светскиот индекс на родова рамноправност. во 2019 година Пакистан беше на 164. место од вкупно 167 места според индексот на „Жена, мир и безбедност“, а зад него беа само Сирија, Авганистан и Јемен.