У19: Македонските фудбалерки со победа го започнаа квалификацискиот турнир за ЕП
Женската млада репрезентација на Македонија до 19 години триумфираше во првиот натпревар од квалификацискиот турнир во Тбилиси (Б лига) за пласман на Европското првенство во 2023 година.
Избраничките на селекторот Астрит Мерко денеска славеа на домаќинот Грузија со конечен резултат 1:0. Стрелец на единствениот гол за нашата селекција беше Симона Ребека Маијер во 64 минута од средбата.
Статистички нашите фудбалерки имаа повеќе обиди за реализација, вкупно 13, четири беа во рамките на противничкиот гол, а ривалот од пет обиди ниту еднаш во рамките на голот на Кабачки.
За Македонија У19 (жени) играа: Кабачки, Блажевска, Мојсоска, Головска, Е. Сулејмани, Маијер, Стеблева (Ефтинџиоска 71`), Л. Сулејмани, Велкова, Села (Панеска 90`), Исејни (Велиу 81`).
Во нашата квалификациска група „6“ е и репрезентацијата на Белорусија против која Македонија ќе ги одмери силите на 7 октомври.