Триумф на МЗТ, а Ворку од Гостивар го има првиот „трипл-дабл“ во Првата лига
Актуелниот шампион, МЗТ Скопје Аеродром ја оствари седмата победа во низа, по триумфот во еден од најинтересните натпревари оваа сезона во македонското кошаркарско првенство.
МЗТ славеше со 78:75 над Гостивар и го преживеа фантастичното издание на противничкиот играч Ијасу Ворку кој стана прв играч сезонава со „трипл-дабл“ во Првата лига. Плејмејкерот на Гостивар ги одигра сите 40 минути и постигна 23 поени, 11 скока и 11 асистенции, но тоа за малку не беше доволно за неговиот тим да ги освои бодовите во големото дерби.
Домаќините ја имаа контролата над играта и резултатот во најголемиот дел од мечот, но не успеаја порано да го решат прашањето околу победникот. Во втората четвртина водеа со 31:17 што беше највисока предност на една од екипите на овој натпревар. Гостиварци вратија со серија од 19:4 за водство од 36:35 на минута пред крајот на полувремето за во последниот напад МЗТ да се избори за минимална предност по 20 минути игра.
Слично беше и во вториот дел, МЗТ водеше со 46:38 и 48:40 за Гостивар преку Ворку и Силаџи да дојде до 50:50. На шест минути пред крајот на натпреварот беше 64:55 за аеродромци и повторно со серија од 9:0, тимот на Александар Јончевски дојде до израмнување. Во продолжение Вер постигна две тројки, а Крстевски погоди две положување за 74:69 на 67 секунди пред крајот, но тука беше Ворку кој со девет поени по ред го одржуваше во живот својот тим.
Драмата достигна кулминација во последните 20 секунди. Мекиќ и Стојановски промашија три слободни фрлања, а Стојановски погоди еднаш за 76:73. На спротивната страна со еден „пенал“ врати Јанески, но одбиената топка ја прифати Тодоровиќ кој имаше шанса на Гостивар да му донесе израмнување и продолжение. Но, Србинот беше прецизен само еднаш и МЗТ преку Стојановски стави точка на мечот. Крстевски и Вер со по 19 поени беа најдобри поединци кај МЗТ Скопје.
Прва лига, 8. коло
Петок –
Кожув – МЗТ Скопје Уни Банка 104:92
МЗТ Скопје Аеродром – Гостивар 78:75
Табела:
1. МЗТ Скопје Аеродром 15 бодови
2. Пелистер 14
3. Гостивар 13
4. ТФТ Скопје 12
5. Работнички 12
6. Кожув 12
—
7. ФМП Академија 11
8. Феникс 2010 10
9. Еуро Никел 9
10.МЗТ Скопје Уни Банка 9
11.Куманово 8
12.КК Ангели 7