Горзад Михајлов повеќе не е тренер на Силекс и го напушти кратовскиот клуб по есенскиот дел од Првата фудбалска лига.

Иако беше еден од најуспешните тренери во историјата на клубот, Михајлов одлучи да си замине и спогодбено го раскине договорот.

„Секогаш има крај на една епизода, епизода која траеше две ипол години. Можам да бидам презадоволен од постигнстите резултати, но тие не би се постигнале ако не ја имав подршката од моите соработници (спортскиот директор Ристиќ, Иванов, Глигоровски, Христовски, Динев, Мицков).

Успеавме да го вратиме Силекс на старите патеки во мак-фудбалот и константно да го подобруваме нашиот рејтинг со игрите и резултатите. Затоа на сите од клубот им благодарам од се срце за неизмерната подршка, шансата која ми ја доверија и ја оправдав со својата посветеност и резултати. Верувам дека во иднина ќе постигнувате позитивни резултати а јас ќе ве следам и навивам за вас. Ти благодарам Кратово, ти благодарам Силекс“,  изјави Михајлов.

Претходно тренерски заминувања видовме во Брера, Шкендија и Вардар, па така од прволигашите со ист тренер од почетокот на сезоната засега остануваат само Струга Трим Лум, Тиквеш, Воска Спорт и Брегалница.