Американскиот претседател Доналд Трамп повторно ги разбранува дипломатските односи со објавување на приватна преписка на социјалната мрежа Трут-сошијал (Truth Social). Овој пат, Трамп сподели фотографија од порака за која тврди дека му ја испратил францускиот претседател Емануел Макрон, во која отворено се доведува во прашање ставот на САД за Гренланд.

Со натпис „Порака од претседателот Емануел Макрон, од Франција“, Трамп го објави текстот на пораката во која Макрон, меѓу другото, му се обраќа на американскиот претседател со зборовите: „Пријателе мој, ние сме целосно усогласени во врска со Сирија. Можеме да направиме големи работи во врска со Иран. Не разбирам што правиш со Гренланд“.

Извор близок до Елисејската палата потврди за Си-ен-ен дека пораката е автентична и дека е во согласност со ставовите што Макрон јавно ги изрази во последните денови. Францускиот претседател претходно ги опиша заканите на Трамп за воведување царини на Гренланд како „неприфатливи“, нагласувајќи дека економскиот притисок не може да се користи за обликување на надворешната политика на европските земји.

Макрон сака Русија повторно на масата на Г7?

Како што објави Доналд Трамп на социјалните мрежи, францускиот претседател Емануел Макрон (48) приватно предложи вечера на Г7 во Париз со присуство на Русија.

Во текстуална порака до американскиот претседател, францускиот лидер напишал: „Можам да организирам состанок на Г7 по Давос во Париз, во четврток. Можам да ги поканам Украинците, Данците, Сиријците и Русите од страна. Ајде да вечераме пред да се вратите.“

Русија беше исклучена (или поточно: суспендирана) од Г8 во март 2014 година, по анексијата на Крим. Оттогаш, групата продолжува да работи како Г7 (САД, Канада, Јапонија, Германија, Франција, Италија и Велика Британија), без Русија.

Односите меѓу Вашингтон и Париз дополнително се влошија откако Макрон ја отфрли поканата на Трамп да се приклучи на таканаречениот „Мировен комитет“, тело кое ќе ја надгледува реконструкцијата на Појасот Газа. Запрашан за одлуката, Трамп остро реагираше, велејќи дека „никој не го сака Макрон“, и најавувајќи можни драстични царини за француските вина и шампањи до 200 проценти.

Тој ги објави и пораките на Руте

Контроверзноста се продлабочи неколку часа подоцна, кога Трамп објави уште еден скриншот, овој пат од наводна порака од генералниот секретар на НАТО, Марк Руте. Во пораката, Руте наводно ја фали улогата на Трамп во Сирија и ја изразува својата подготвеност да „најде пат напред во врска со Гренланд“, ветувајќи дека ќе ги истакне потезите на Трамп во Сирија, Газа и Украина на Светскиот економски форум во Давос.

„Господине претседателе, драг Доналд, она што го постигнавте денес во Сирија е неверојатно“, се вели во пораката, заклучувајќи: „Се радувам на средбата со вас. Ваш, Марк.“

Трамп напиша покрај објавата: „Ви благодарам, Марк Руте, генерален секретар на НАТО!“

За разлика од пораката на Макрон, автентичноста на наводната порака од Марк Руте сè уште не е потврдена. Си-ен-ен вели дека не може независно да ја потврди содржината и контактирала со прес-службата на НАТО за коментар.

Сепак, познато е дека Руте претходно јавно го пофалил Трамп, вклучувајќи ги и неговите потези во врска со Иран, како и неговите иницијативи за започнување разговори за војната во Украина.