Американскиот претседател Доналд Трамп изјави дека ќе ги објави резултатите од магнетната резонанца на која беше подложен во октомври, пренесува Еј-би-си њуз.

Вчера, по враќањето од Флорида во Вашингтон, Трамп за време на дијалог со новинарите рече:

„Ако сакате да ги објавам, ќе ги објавам “.

Тој дури нагласи дека резултатите се одлични.

Тестот предизвика интензивни шпекулации во Америка за здравјето на 79-годишниот Трамп, а Белата куќа засега одбива да коментира за причините за тестот, како и за делот од телото на кој е извршен.

Портпаролката Каролин Ловит изјави дека претседателот, како дел од редовниот медицински преглед, бил подложен на „напредно снимање“ во Националниот воено-медицински центар „Волтер Рид“, при што резултатите укажуваат на одлична физичка состојба.

Трамп во неделата додаде дека „тоа било само магнетна резонанца“ и рече дека нема поим на кој дел од телото е извршена. Сепак, тој нагласува дека не било во мозокот, бидејќи „се истакнал“ на когнитивниот тест на кој бил подложен.