Американскиот претседател Доналд Трамп планира официјална посета на Грција, изјави американската амбасадорка во Атина, Кимберли Ан Гилфојл, сигнализирајќи го растечкиот интерес на Вашингтон за југоисточниот медитерански регион, јавуваат грчките медиуми.

Зборувајќи на презентацијата на новиот документарен филм на првата дама на САД, Меланија Трамп, во Атина во недела, Гилфојл рече дека со нетрпение ја очекува посетата на американскиот претседател и на неговата сопруга.

„Знам дека претседателот ќе дојде и навистина со нетрпение очекувам двајцата – вклучително и Меланија – да дојдат да ја посетат Грција. Тоа би било неверојатна чест за земјата, да“, рече Гилфојл.

Таа не прецизираше кога би се случила таквата посета или дали Трамп ќе застане и во блиските земји од стратешко значење за американските интереси, како што се Израел, Кипар и Турција.

Откако Трамп беше реизбран, американските компании ги зголемија инвестициите за истражување на гас и нафта во Источниот Медитеран. Самата Гилфојл ја опиша Грција како „водечки играч во енергетската иднина на Европа“. Покрај тоа, за разлика од многу партнери на Вашингтон во ЕУ, Грција се согласува со Трамп во врска со потребата Европа да увезува повеќе течен природен гас (ЛНГ) од САД.

Во меѓувреме, Атина ги обнови односите со Израел и со Кипар во обид да ја зајакне координацијата во одбраната и енергетиката. Ова обнова внимателно се следи во Анкара, каде што официјалните лица стравуваат дека триото би можело да ја наруши регионалната рамнотежа на моќ.