За евтино ол инклузив летување, една европска дестинација е прогласена за најповолно место за одмор ова лето. Според анализата на „Травелсупермаркет“, регионот Бургас на бугарското крајбрежје е идеален избор за семејства, благодарение на долгите песочни плажи и хотелите со водени паркови, пренесува „Сан“.

Според нивната анализа за 2026 година, Бугарија го презеде првото место на листата на најевтини летни дестинации. Еднонеделен одмор во регионот Бургас во просек чини околу 640 евра по лице.

Регионот Бургас се наоѓа на брегот на Црното Море во југоисточна Бугарија. Најголем град во областа е Бургас, но најпознато летувалиште е Сончев Брег.

Станува збор за најголемото бугарско летувалиште со речиси осум километри златни песочни плажи и богат ноќен живот. На платформата „Травелсупермаркет“, ол инклузив аранжмани за Сончев Брег за неделата што започнува на 15 јуни може да се најдат веќе од 290 евра по лице.

Во текот на јули, за време на училишните распусти, цените се зголемуваат и достигнуваат околу 610 евра по лице.

Меѓу популарните места во регионот се и историските градови Созопол и Несебар. Несебар е познат по богатата историја, морскиот брег и шармантните камени улици. На влезот во градот се наоѓа Ветерницата во Несебар, изградена во 19 век, која денес е симбол на поморската историја на градот.

Според податоците на „Нумбео“, Бугарија е меѓу поповолните европски летни дестинации и кога станува збор за секојдневните трошоци. Шише вода во просек чини околу 1,10 евра, капучино околу 2,20 евра, топка сладолед околу 1,40 евра, а домашно точено пиво околу 2,25 евра.

Оброк во поевтин ресторан во просек чини околу 10 евра, додека вечера за две лица во ресторан од средна категорија изнесува околу 41 евро. Секако, цените во туристичките места на крајбрежјето може да варираат зависно од локацијата и делот од сезоната.

Во изненадувачки пресврт, Тунис, кој минатата година беше најевтина дестинација, оваа година целосно испадна од првите десет. Истовремено, Родос, Мајорка и Даламан се поевтини во споредба со минатото лето, со заштеда до 105 евра по лице.

На четвртото место е Анталија со просечна цена од 700 евра, додека петтото место го зазема грчкиот Родос со просек од 703 евра по лице.

Крис Вебер, раководител на секторот за патувања и понуди во „Травелсупермаркет“, изјавил дека Бугарија оваа година направила голем исчекор.

„Регионот Бургас, каде што се наоѓаат Сончев Брег и Бургас, долго време е едно од најповолните места на Црното Море, но фактот што го престигна Тунис на листата на најповолни ол инклузив дестинации покажува колку вредност моментално нуди за туристите“, изјавил Вебер.

„Травелсупермаркет“ анализирал ол инклузив аранжмани резервирани меѓу 1 и 20 април 2026 година за патувања планирани од мај до септември 2026 година, вклучувајќи ги сите категории хотели, времетраење на одморите и типови патници.