Toни Атанасов привремен тренер на Академија Пандев
На две кола пред крајот Александар Васоски си поднесе оставка од клупата на Академија Пандев по вчерашниот пораз на домашен терен од Тиквеш со 1:4.
Оставката на Васоски е неотповиклива и доаѓа во момент кога тимот го има обезбедено опстанокот ПМФЛ бидејќи е јасно дека од првенството испаѓа Победа, а бараж натпревар ќе игра Скопје. За Васоски ова беше втор мандат на клупата на струмичкиот клуб, но не беше успешен како првиот. Во Струмица се врати од Босна каде што го водеше Сараево.
Денес струмичкиот клуб се огласи и изрази благодарност за неговата работа, но и потврди дека тимот до крајот на првенството ќе го води Тони Атанасов.
„Благодарност до тренерот Александар Васоски и првиот асистент Раденко Бојовиќ за професионалниот ангажман и посветеноста кон тимот изминатиот период. Управниот одбор на клубот ја прифати понудената оставка и донесе одлука до крајот на сезоната сениорскиот тим да го предводи тренерот Тони Атанасов“, стои во објавата.
Нема да биде првпат Атанасов како привремен тренер да ги води „пандевци“ во ваква улога беше и кога кормилото во минатото го напушти Југослав Тренчовски. Противци на Академија Пандев до крајот на сезоната ќе бидат Брегалница (гости) и Силекс (дома).