Ендру Маунтбатен-Виндзор наводно добил препорака од кралските советници да се воздржи од јавање коњи по неговото апсење под сомнение за злоупотреба на службената должност, пишува „Индепендент“.

Според „Сан“, на поранешниот принц му било укажано дека не би изгледало соодветно да биде виден како ужива во јавање додека е под полициска истрага. Тој беше уапсен од полицијата на Темс Вали минатиот четврток, на својот 66. роденден, и беше испрашуван 11 часа пред да биде ослободен и да се врати во својот нов дом, Вуд Фарм, на имотот Сандрингам. Обвиненијата се однесуваат на наводно споделување доверливи информации со осудениот педофил Џефри Епстин додека ја извршувал функцијата трговски пратеник на Обединетото Кралство.

Извор за „Сан“ изјавил: „По апсењето минатата недела му беше наложено да не оди на јавање. Се смета дека тоа не остава добар впечаток. Не мислат дека треба да биде виден како се смее и ужива на коњ, како што беше во Виндзор. Но тоа беше една од ретките работи во кои навистина уживаше, па што ќе прави со своето време?“.

Бакингемската палата одби да го коментира случајот.

Во меѓувреме, британската влада најави објавување на документи поврзани со неговото именување за трговски пратеник, функција што ја извршуваше од 2001 до 2011 година. Пратениците едногласно ја поддржаа иницијативата на Либералните демократи за јавно објавување на материјалите, вклучително и евентуалната безбедносна проверка и преписката со Питер Менделсон.

Лорд Менделсон исто така беше уапсен под сомнение за злоупотреба на службената должност, поради слични обвинувања дека за време на мандатот како министер за бизнис споделувал чувствителни информации со Епстин.

Во Долниот дом, пратеници од сите партии остро го критикуваа Маунтбатен-Виндзор. Конзервативниот министер Алекс Бургарт изјави дека „може да се препознае раката на Епстин“ во неговото именување во 2001 година. Трговскиот министер во владата на Кир Стармер, сер Крис Брајант, го опиша како „груб, арогантен и човек кој смета дека сè му припаѓа“, додавајќи дека бил во постојана трка за самопромоција и лично збогатување.

Пратеничката Моника Хардинг изјави дека Маунтбатен-Виндзор ја извршувал функцијата десет години и покрај тоа што неговата „репутација му претходела“, а загриженоста била игнорирана. Таа посочи дека додека работела во Британскиот совет, неговите посети како трговски пратеник биле проследени со воздивнувања од персоналот, кој стравувал дека може да каже нешто несоодветно.

Маунтбатен-Виндзор решително ги негира обвинувањата поврзани со Епстин, но засега не се произнел за најновите случувања.

Полицијата во вторникот соопшти дека е завршен претресот на неговата поранешна резиденција во Беркшир, по речиси еднонеделна акција. Помошник-началникот на полицијата на Темс Вали, Оливер Рајт, изјави дека истрагата продолжува и дека јавноста ќе биде информирана кога тоа ќе биде соодветно, но дека тоа најверојатно нема да се случи во блиска иднина.

Принцот Вилијам и принцезата Кејт за случајот Епстин: „Длабоко сме загрижени за откритијата, нашите мисли се со жртвите“