„Тоа дефинитивно…“: Поранешната партнерка на Џим Кери со реакција за неговиот изглед на наградите Цезар
Актерката Џени Мекарти ги коментираше шпекулациите за изгледот на нејзиниот поранешен партнер, актерот Џим Кери, негирајќи ги теориите дека тој бил „заменет“ или дека некој го имитирал на неодамнешното доделување на француските награди Цезар.
Препорачано
Во изјава за списанието „Пипл“, дадена за време на доделувањето на музичките награди на „Ај харт рејдио“ на 26 март, Мекарти децидно изјави дека „дефинитивно тоа бил Џим Кери“, осврнувајќи се на гласините што се проширија на социјалните мрежи.
Таа нагласи дека повеќе од неговиот изглед, нејзе ѝ било впечатливо колку среќно изгледал актерот.
„Изгледаше многу среќен на таа церемонија. И јас бев среќна за него. Тоа беше првото нешто што го забележав“, изјави Мекарти.
Нејзиниот сопруг, Дони Волберг, исто така се надоврза, посочувајќи дека јавноста премногу се фокусира на физичкиот изглед, наместо на емоционалната состојба на актерот.
„Толку сме опседнати со тоа како изгледа, што не забележуваме колку изгледа среќен“, рече тој.
Шпекулациите се појавија по неговото појавување на доделувањето на наградите Цезар во Париз на 26 февруари, каде што Кери прими почесна награда за својот придонес во филмската и телевизиската индустрија. Тој настан го одбележа неговото враќање во јавноста, што предизвика големо внимание на интернет.
Организаторите на церемонијата потврдија дека актерот лично присуствувал на настанот, а неговиот говор бил одржан на француски јазик, на кој, според нив, се подготвувал со месеци.
Да потсетиме, Џени Мекарти и Џим Кери беа во врска пет години, од 2005 до 2010 година, по што се разделија во пријателски односи. Во тоа време, Мекарти изјави дека е благодарна за заедничките години и дека Кери секогаш ќе има посебно место во нејзиното срце.
Кери последен пат се појави на големото платно во улогата на негативецот доктор Роботник во филмската франшиза „Соник – суперхеројот еж“ (Sonic the Hedgehog), со продолженија објавени во 2020, 2022 и 2024 година.
