Компанијата „Тесла“ забележа пад од 23 проценти во заработката во вториот квартал од 2025 година и предупреди на понатамошни загуби поради економските последици од трговската војна што ја води Доналд Трамп и новиот закон за фискална политика насочен против електричните возила, пишува Фајненшл тајмс.

Таканаречениот „голем убав закон“, предвидува укинување на државните субвенции за електрични возила – клучна точка што досега ѝ носеше на „Тесла“ предност пред конкурентите. Аналитичарите предупредуваат дека без тие субвенции, компанијата ќе се соочи со значајна загуба на пазарниот удел и конкурентноста.

Извршниот директор Илон Маск призна дека компанијата е во „транзициски период“ и најави неколку тешки квартали. Тој додаде дека политичките турбуленции во САД негативно влијаат врз перспективите на целата индустрија за електрични возила. Акциите на Тесла веќе паднаа за повеќе од 4 проценти веднаш по објавата, и се на 30 проценти под нивото од декември.

Односот меѓу Маск и Трамп дополнително се влоши по усвојувањето на новиот закон, а Маск најави формирање сопствена политичка партија и се повлече од Белата куќа, каде претходно имаше неформална улога во Советот за владина ефикасност.

Според објавените податоци, нето добивката на компанијата за вториот квартал изнесува 1,4 милијарди долари, што е значајно помалку од 1,8 милијарди во истиот период минатата година. Аналитичарите ја оценуваат состојбата како сериозен удар за иднината на Тесла на американскиот пазар.