41-годишна жена загина во тешка сообраќајна несреќа што се случила вчера попладне на локалниот пат кај селото Русјаци, во општината Македонски Брод.

Според информациите од полицијата, во несреќата повредени се и три лица, меѓу кои и шестгодишно дете.

„Според информациите, патничко возило „цитроен“ со кичевски регистарски таблички, управувано од нејзиниот сопруг, излетало од коловозот и се превртело. Жената, идентификувана како К.С.С., починала на самото место како последица на тешките повреди, а смртта ја констатирал лекар од Итната медицинска помош. По наредба на јавен обвинител, телото на починатата е предадено на обдукција“ соопшти МВР.

Во несреќата телесни повреди здобиле уште три лица – С.С. (69), М.С. (62) и шестгодишно дете. Тие биле итно пренесени во Општата болница во Прилеп, каде им била укажана соодветна медицинска помош.