Македонската тениска репрезентација претрпе пораз од Молдавија со 2-1 на стартот од настапот во Третата Европска група од Дејвис купот во Кишињев, иако избраниците на селекторот добро го отворија дуелот.

Првиот поен за Македонија го донесе Калин Ивановски, кој по пресврт го совлада Иља Снитари со 2-1 во сетови (4-6, 6-3, 6-1) и ѝ обезбеди почетна предност на нашата селекција.

Во вториот меч, Олег Приходко беше на добар пат да го завери триумфот, откако го освои првиот сет против Раду Албот во тај-брејк со 10-8. Сепак, проблемите со грчеви го принудија да побара медицинска помош, што искусниот Албот умешно го искористи. Молдавецот го доби вториот сет со 7-5, а Приходко поради физичките проблеми не можеше да го заврши решавачкиот сет и го предаде натпреварот.

Слично сценарио се случи и во мечот во двојки. Ивановски и Приходко имаа солиден почеток и водеа во текот на дуелот, но противниците Раду Албот и Иља Снитари постепено ја презедоа контролата. Бидејќи здравствените проблеми на Приходко продолжија, македонскиот тандем беше принуден да го предаде и овој меч, со што победата ѝ припадна на Молдавија.