Најдобрата македонска тенисерка Лина Ѓорческа не успеа да го мине првото коло на турнирот во Загреб, откако по голема борба беше поразена од Русинката Екатерина Казионова со 2-1 во сетови.

Македонката одигра одличен вовед во мечот и целосно доминираше во првиот сет, кој го доби убедливо со 6-1. Ѓорческа беше блиску и до конечна победа во вториот сет, кога поведе со 5-3 и имаше меч-топка, но не успеа да ја реализира шансата за триумф.

Казионова ја искористи паднатата концентрација на македонската тенисерка, направи пресврт и го освои вториот сет со 7-5, израмнувајќи на 1-1.

Во решавачкиот трет сет двете тенисерки водеа изедначена битка, но во завршницата повеќе присебност покажа руската претставничка, која со 6-4 го комплетираше пресвртот и обезбеди пласман во следната рунда од турнирот во хрватската престолнина.