Музичко-сценското шоу „Глумците пеат“, кое се изведува по повод Светскиот ден на театарот, оваа година ќе се одржи на 24 и 25 март на сцената на Македонскиот народен театар, со почеток во 20 часот.

Годинава шоуто е посветено на македонската музика од различни периоди – песни што публиката ги знае, но ќе ги слушне во нова актерска интерпретација. Покрај соло изведби, на сцената ќе има и повеќе дуети и групни точки, што носат поинаква динамика и сценска енергија.

На сцената ќе настапат актери од повеќе генерации – со нови имиња кои за првпат ќе бидат дел од проектот, но и со добро познатите што и досега ја кревале публиката на нозе.

Режијата е на Дејан Пројковски, а актерите ќе ги придружува оркестар под диригентска палка на маестро Љупчо Мирковски. Аранжманите се на Бобан Мирковски, кореографијата на Олга Панго, а костимографијата на Марија Пупучевска.

– „Глумците пеат“ не е претстава, ниту концерт, туку спој на театар и музика што им овозможува на глумците барем една вечер да бидат поинакви од она што вообичаено го работат на своите сцени. Имаме многу талентирани уметници кои со голема посветеност ги подготвуваат своите точки и едвај чекаат да ги споделат со публиката – велат организаторите.

Манифестацијата „Глумците пеат“ со години се вбројува меѓу најпосетуваните сценски случувања во овој период. Проектот продолжува како наследство на актерот Марин Бабиќ, кој во 1990-тите го создаде шоуто, а подоцна беше возобновено од неговите ќерки Маја и Ира Бабиќ.

(Текстот е објавен во „Културен печат“ број 325, во печатеното издание на весникот „Слободен печат“ на 20-22.3.2026)