Македонија слави уште еден историски ракометен успех, ГРК Охрид е победник на ЕХФ Европскиот куп за сезоната 2025/2026, повторувајќи го успехот на Алкалоид од претходната година.

Играчите на тренерот Борис Ројевиќ направија чудесен резултат во својата прва сериозна европска сезона.

Ја совладаа Татабања во салата „Билјанини извори“ пред своите верни навивачи во реваншот од финалето со 31:25 (12:11) (прв натпревар 29:28), завршувајќи ја европската сезона со 11 победи и само еден пораз.

Во победата и историскиот успех во финалниот меч придонесе и пивотот на ГРК Охрид, Иван Тасески кој запиша три гола против Татабања.

– Малку влеговме во грч во натпреварот, знаевме дека ќе биде вака. Атмосферата беше феноменална, во второто полувреме ги намаливме грешките во напад, зицерите почнавме да ги реализираме. Одбраната функционираше перфектно на овој натпревар и на крајот го освоивме пехарот, сега останува да славиме. Благодарност до навивачката група „Рибари“, беа одлични, сè беше перфектно, и се надевам на поголеми успеси – изјави Тасески по реваншот со унгарската екипа.

Историско славје за Охрид, трофејот од ЕХФ купот остана во Македонија