Ракометниот клуб Охрид испиша историски успех, откако ја освои титулата во ЕХФ Европскиот куп. Охриѓани триумфираа и во реванш-финалето против унгарска Татабања со 31-25, со што го потврдија европскиот трофеј и донесоа голема радост за македонскиот ракомет.

Со овој подвиг, Охрид се надоврза на минатогодишниот успех на Алкалоид во истото натпреварување, а воедно го освои и првиот европски трофеј во клупската историја.

Гостинскиот состав беше рамноправен во првиот дел и во неколку наврати имаше минимална предност, но домаќините на пауза заминаа со водство од 12-11. Охрид можеше да има и поубедлива разлика, но голманот на Татабања, Ариан Андо, беше во одлично издание и со серија важни интервенции го одржа својот тим во игра.

Клучниот момент беше на стартот од второто полувреме кога Охрид со силна серија од 5-1 создаде предност од пет гола (17-12), која се покажа како пресудна. Иако Татабања се обидуваше да се врати во натпреварот и успеа да намали на минус два, македонскиот претставник не дозволи неизвесна завршница и сигурно го приведе мечот кон историска победа.

Одлична партија одигра Косуке Јасухира, кој постигна девет погодоци, додека Стрмљан додаде шест, а Јагуриновски четири гола. На голот блескаше и Кристијан Пилиповиќ со 13 успешни интервенции, давајќи огромен придонес во европскиот триумф на охридскиот состав.