Тајван инсистира на тоа дека е суверена, независна нација, откако американскиот претседател Доналд Трамп го предупреди да не прогласува формално независност од Кина.

Коментарите на Трамп дојдоа по дводневниот самит во Пекинг, по што тој рече дека „не презел никаква обврска“ во врска со самоуправниот остров – кој Кина го смета за дел од нејзината територија и не ја исклучи можноста за негово земање со сила.

По разговорите со кинескиот претседател Си Џинпинг, Трамп исто така рече дека наскоро ќе одлучи дали да одобри пакет оружје од 11 милијарди долари што ќе му се продаде на Тајван.

Трамп откри детали од разговорот со Си Џинпинг

Американската администрација е обврзана со закон да му обезбеди на Тајван средства за самоодбрана, но честопати мораше да го усогласи овој сојуз со одржување дипломатски односи со Кина.

Тајванскиот претседател Лаи Чинг-те претходно изјави дека Тајван не треба да прогласи формална независност бидејќи веќе се смета себеси за суверена нација.

Портпаролката на претседателот Карен Куо денеска рече дека е „очигледно“ дека Тајван е „суверена, независна демократска земја“.

Сепак, таа додаде дека Тајван е посветен на одржување на статус кво со Кина – во кое Тајван ниту прогласува независност од Кина, ниту се обединува со неа.

Многу Тајванци се сметаат себеси за дел од посебна нација, иако повеќето се за одржување на нивниот сегашен статус.

Утврдениот став на Вашингтон е дека не ја поддржува независноста на Тајван, при што континуираните врски со Пекинг зависат од прифаќањето дека постои само една кинеска влада.

Во интервју за „Фокс њуз“ по средбите со претседателот Си, Трамп повтори дека политиката на САД кон Тајван не се променила, додека јасно стави до знаење дека не бара конфликт со Пекинг.

„Не барам некој да стане независен. Знаете, треба да патуваме 9.500 милји (15.289 км) за да водиме војна. Не го барам тоа. Сакам да се оладат. Сакам Кина да се олади“ рече Трамп.

На летот назад кон Вашингтон, американскиот претседател им кажа на новинарите дека тој и Си разговарале „многу“ за островот, но рече дека одбил да разговара дали САД ќе го бранат.

„Си има многу силни чувства за островот и не сака да види движење за независност“, рече Трамп.

„Не сакам да одиме 15 илјади километри за да водиме војна“: Трамп го предупреди Тајван да не прогласува независност