Струга Трим Лум дебитира сезонава во нашето најдобро фудбалско првенство и со своите игри покажа дека не случајно се наоѓаат во елитата.

Тоа го докажуваат и победите во есенскиот дел над актуелниот бранител на титулата, Шкендија (2:1) и Вардар (2:1), екипи кои претендираат за највисок пласман во шампионатот.

Струга ТЛ веќе долг период не знае за пораз (од 27 октомври 2019 год.), доколку ги вклучиме и куп мечевите, тоа се вкупно осум натпревари по ред.

Моментно играчите на тренерот Јетон Беќири се на шестото место во 1МФЛ со 24 бодови, но заостануваат само четири зад второпласираната Шкендија во генералниот пласман.

– Па, можам да кажам дека сме задоволни од досегашната сезона со оглед на тоа дека ние како екипа сме дебитанти во најдобрата македонска лига. Победите над Вардар и Шкендија една по друга кажува дека ништо не е случајно и докажува дека Струга Трим Лум може да биде незгоден противник за сите- ни изјави Арбен Тафа, фудбалерот на Струга Трим Лум.

Во првиот натпревар од четвртфиналето на фудбалскиот Куп на Македонија, стружани како домаќините ремизираа без голови против екипата на Ренова.

Според најавите реваншот за пласман во полуфиналните мечеви ќе се одигра на 4. март наредната година.

– Мислам дека 0:0 е добар резултат со оглед на што реваншот се игра на гостински терен и гол на гости важи повеќе – додаде Тафа.

Моментно фудбалерите се на заслужен одмор, а наредниот прволигашки меч ќе го имаат на 16. февруари 2020 година дома против Работнички.