Поради отсуство на сведокот Горан Анастасиевиќ од здравствени причини, денеска во Основниот кривичен суд се одложи судењето против поранешниот генерален секретар на Владата, Мухамед Зеќири, кој се товари за „злоупотреба на службена положба и овластување“, а следното судење е закажано за 6 јуни.

Минатиот месец Зеќири се појави во судницата после три месеци отсуство, а судењето беше вратено на почеток. Расправите за случајот беа долго во прекин откако одбраната на Зеќири oбезбеди препорака на психијатар, кој проценил дека на Зеќири му е влошена психичката состојба.

Зеќири се појави во судница по три месеци, случајот се враќа на почеток

Обвинителството го товари Зеќири дека во периодот од април 2021 до јануари 2022 година во својство на генерален секретар на Владата, без да спроведе јавна набавка, склучил договори за консултантски услуги со фирма во вкупна вредност од речиси еден милион евра, односно биле платени 147.000 евра повеќе од претходно договорените 795.000.

На 9 април минатата година на Зеќири му беше одредена мерка притвор, која што поради здравствени причини во јуни годинава му беше заменета со домашен притвор.

Процесот го води судијката Фанка Јанчулева Михаиловска, а застапник на обвинението е обвинителката Катерина Коларевиќ.