Студентскиот оброк од октомври ќе се исплаќа преку наменска платежна картичка
Министерството за образование и наука воведува нов начин на исплаќање на средствата од студентскиот оброк. Во новата академска година, студентите ќе добиваат парични средства на наменска платежна картичка. Министерот Јетон Шаќири истакна дека ова е системското решение со кое студентите ќе добиваат финансиска поддршка само за намената за која се одвојуваат од буџетот на МОН.
Препорачано
Средствата ќе се исплаќаат преку Шпаркасе банка АД Скопје, со која МОН денеска склучи договор. Сите студенти кои ќе стекнат право на субвенциониран студентски оброк, ќе треба да потпишат договор со Шпаркасе банка за отворање на посебна сметка, поврзана со наменската платежна картичка за субвенциониран студентски оброк, независно од тоа дали претходно биле клиенти на банката.
За отворањето на сметката, издавањето и одржувањето на платежната картичка студентот нема да има трошоци. Наменската картичка е дел од пакетот што ќе го добие студентот кој стекнал право на субвенциониран студентски оброк.
Годишно, за оваа мерка од буџетот на МОН се одвојуваат над 940 милиони денари.
