Младиот шахист од ШК Алкалоид, како член на репрезентацијата на Македонија, Стефан Мелник освои сребрен медал на Светското екипно првенство за слабовидни и слепи шахисти (IBCA), одржано во Црна Гора.

Како најмлад репрезентативец и единствен играч под 18 години на турнирот, Мелник настапи во последните пет кола и освои 4,5 поени, што му донесе сребрен медал на петтата табла и значителен рејтинг‑напредок.

– Поканата да играм за репрезентацијата на слабовидни и слепи шахисти дојде во вистинско време за мене бидејќи претходниот период бев посветен на нешта кои го оттргнаа мојот фокус од шаховската игра. Почувствував дека немам што да загубам и растоварено влегов во овој турнир. Во првите неколку кола шанса за настап добија поискусните играчи, а моите пет минути дојдоа во втората половина на првенството. Враќањето во натпреварувачки ритам не беше лесно, но успеав да ја искористам шансата која ми беше дадена. Овој успех ме мотивира да продолжам понатаму – рече Мелник.