Денеска со голема тага и вечен непребол се сеќаваме на нашиот Тоше Проески. 25 јануари е денот кога пред 40 години, се роди најсветлата ѕвезда на нашето небо.

Во чест на неговиот роденден, денес, сите радиа пуштаат по некоја од неговите а наши засекогаш омилени песни кои сѐ уште ги знаеме наизуст.

Тодор Проески е роден на 25 јануари 1981 година во Прилеп, со постојано живеалиште во Крушево. Својата пасија кон музиката ја покажал уште од мали нозе. Уште како ученик во основно образование, кога во 1992 година за прв пат настапил на фестивалот „Златно славејче“ инстантно ја воодушевил публиката пеејќи на влашки јазик.

По 1997 година со победата на фестивалот „Мелфест“ во Прилеп, Проески ги освои срцата на сите генерации и беше присутен на речиси сите фестивали во и надвор од границите на нашата земја.

Европа имаше чест да го слушне и запознае извонредниот талент на нашиот Тоше во 2004 година, кога ја претставуваше Македонија на „Евровизија“ во Истанбул со песната „Ангел си ти“. Истата година тој стана и амбасадор на добрата волја на „UNICEF“.

Тоше беше повеќе од музичка ѕвезда, повеќе од музички талент, тој пред сѐ беше човек со големо срце кое не познаваше граници.

На 16 октовмри, 2007 година Македонија, целиот Балкан и пошироко се потресе од трагичната вест за пејачот кој го загуби животот во сообраќајна несреќа на само 26 години.

По повод 40 роденден на Тоше, неговата сестра Дора Проеска на својот фејсбук-профил објави фотографија од роденденска торта на која пишува „Те сакаме сите Toше“.

Музиката на Тоше го обедини народот зад себе оставајќи песни кои до ден денес се пеат, се пренесуваат од генерација на генерација и кои за момент, нѐ тераат да заборавиме дека тој веќе не е меѓу нас.

Среќен роденден Тоше, што и да се напише е премалку.