Како и што се најавуваше претходно во медиумите, Светислав Пешиќ повеќе не е селектор на репрезентацијата на Србија.

Пешиќ ја напушта клупата на репрезентацијата по освоената бронза во Париз на Олимписките игри. Заминувањето го потврди самиот селектор, а една од главните причини е промената на раководството.

„Претседателот на КСС, Предраг Даниловиќ поднесе оставка. Како што разбрав тоа го направи за да овозможи на новото раководство да формира нов стручен штаб и да постави нови цели. Кога сум јас во прашање уште пред Париз соопштив дека некој друга треба да го продолжи она што го започнав.

Бидејќи гледам дека некои не слушнале, сега им порачувам на одговорните кои во иднина ќе го водат КСС дека треба да најдат нов тренер. Јас секогаш ќе бидам на располагање на српската кошарка, но ќе се насочам кон некои други цели и проекти за кои немав време затоа што 24 часа бев во служба на националниот тим“, изјави меѓу другото легендарниот тренер.

Пешиќ освен бронзата во Париз со Србија успеа да освои и сребро на Светското првенство кое се играше претходно. На Олимписките игри избраниците на Пешиќ беа блиску и да слават во натпреварот против американскиот „дрим-тим“.

Засега не е познато кој би можел да го наследи на клупата на репрезентацијата.