Одржувањето на хидратацијата во организмот звучи едноставно – само испијте малку вода и готово. Но, откривањето кои пијалаци всушност хидрираат може да биде збунувачко.

За спортските пијалаци, соковите, кафето и популарните пијалаци за велнес, интернетот е преплавен со спротивставени информации за тоа што помага, а што ја попречува вашата хидратација.

Иако повеќето луѓе знаат дека треба да пијат повеќе течности, видот на пијалак што го избирате може да направи голема разлика. Според експертите некои пијалаци, ако се консумираат премногу често, всушност можат да работат против вашите цели, пишува „Итинг вел“.

Само затоа што пијалакот не е најдобрата опција за хидратација, не значи дека е забранет. Повеќето пијалаци имаат место во балансирана исхрана. Сепак, најдобро е да се избегнуваат следниве пијалаци кога треба да се хидрирате.

Енергетски пијалаци

– Бидејќи енергетските пијалаци понекогаш се промовираат за консумирање за време на вежбање, многу луѓе погрешно претпоставуваат дека хидрираат. Сепак, некои енергетски пијалаци може да содржат состојки кои дејствуваат како диуретици, како што е аминокиселината таурин- објаснува нутриционистката Мелиса Митри.

Тауринот често се додава за подобрување на перформансите, но може да доведе до губење на течности со стимулирање на мокрење и потење. Покрај тоа, многу енергетски пијалаци содржат високо ниво на кофеин, понекогаш и повеќе од две шолји кафе, што дополнително придонесува за губење на течности.

Овошен сок

– Иако на пазарот има сè повеќе сокови со намален шеќер, многу овошни сокови, дури и оние означени како 100 проценти природен овошен сок, сепак можат да содржат многу шеќер. Иако повремената консумација веројатно нема да биде проблем, редовното пиење сок може да го зголеми шеќерот во крвта, што го зголемува мокрењето додека бубрезите се обидуваат да го отстранат вишокот шеќер од телото – вели Митри.

Ненадејниот скок на шеќерот во крвта од зашеќерени пијалаци како што е овошниот сок го принудува телото да ги врати нивоата во нормала, што може да доведе до зголемено губење на течности. Затоа е подобро да пиете сок во помали количини или да го разредувате со вода, наместо да го користите како главен извор на хидратација.

Готово смути и зелен сок

– Готовите смутија и зелените сокови често содржат многу овошје или додадени засладувачи, што ги прави послатки отколку што изгледаат. Нивната содржина на шеќер може да придонесе за дехидрација ако ги пиете повеќе пати во текот на денот или наместо вода – вели Митри.

Додека домашните смутија со избалансирани состојки можат да бидат дел од здрава исхрана, многу опции купени од продавница се богати со шеќер и ниски со растителни влакна, што може да предизвика скокови на шеќерот во крвта слични на оние од овошниот сок.

Ова не значи дека треба целосно да ги избегнувате смутијата и зелените сокови, туку консумирајте ги како повремена ужина, а не како ваш главен извор на хидратација.

Пијалаци од кафе со висока содржина на кофеин

– Премногу кофеин може да доведе до дехидрација бидејќи извлекува вода од телото со зголемување на потењето или мокрењето. Пиењето една до две шолји кафе од 225 грама веројатно нема да предизвика проблем кај повеќето луѓе, но пиењето повеќе од четири шолји може да придонесе за зголемено губење на течности – вели Митри.

Важно е да се напомни дека толеранцијата на кофеин варира многу од личност до личност. Сепак, ако сакате да останете хидрирани, добра идеја е да го балансирате внесот на кофеин со многу вода.

Како да изберете хидратантен пијалак?

Ако не сте сигурни дали вашиот омилен пијалак ви помага или ви штети, не сте сами. Ограничете го внесот на додадени шеќери, бидејќи тие можат да го зголемат шеќерот во крвта и да го зголемат мокрењето. Изборот на пијалаци со малку или без додаден шеќер може да ви помогне да останете хидрирани.

Исто така, контролирајте ја содржината на кофеин. Умерениот внес е во ред за повеќето луѓе, но поголемите количини можат да го зголемат губењето на течности. Ако редовно пиете кафе или енергетски пијалаци, избалансирајте ги со многу вода. Одржувајте ги состојките едноставни. Пијалаците со пократки списоци на состојки имаат помала веројатност да содржат адитиви кои можат да имаат диуретично дејство.

Најдобри хидратирачки пијалаци

Обичната вода е златен стандард за хидратација.

– Најдобрата опција е обична или природно ароматизирана вода, како што е со лимета, лимон или нане – вели Митри.

Ако ви е здодевна обичната вода, додадете парчиња овошје или билки во неа.

Незасладената газирана вода е исто така освежителна алтернатива. Што се однесува до електролитните пијалаци, Митри вели: „Тие генерално не се неопходни за хидратација освен ако не се потите многу или не вежбате редовно повеќе од еден час“.  Во тие случаи, една чаша дневно може да ви помогне да останете хидрирани.