Во галеријата „Народне осветове центрум“ (Národné osvetové centrum) во Братислава на 27 мај беше отворена изложбата „Од глаголица до светлина: Визуелна ода за Св. Кирил и Методиј“ на која беа претставени делата на 4 современи македонски уметници: Лазе Трипков, Ана Митевска, Ангел Коруновски и Александра Костадиновска.

Куратор на изложбата е д-р Кирил Пенушлиски, историчар на уметност, а организацијата е на Јасминка Намичева од „Архифакт“ – Скопје. Изложбата беше поддржана од Министерството за култура и туризам на РС Македонија и Амбасадата на РС Македонија во Братислава.

Низ различни медиуми – сликарство, фотографија и современи визуелни интерпретации уметниците ја истражуваа релацијата помеѓу историската меморија и современиот уметнички израз, помеѓу трагот на словото и симболиката на светлината како духовна и визуелна категорија со што се воспостави современ визуелен дијалог со духовното и културното наследство на Св. Кирил и Методиј, глаголицата и словенската писменост.

Изложбата претставува обид за современо читање на културното наследство – не како статичен историски артефакт, туку како жива визуелна и духовна структура што продолжува да комуницира со современиот контекст.

Во присуство на голем број амбасадори, министри, претставници на дипломатскиот кор, уметници и јавни личности на отворањето на изложбата се обратија Н.Е. Евгенија Илиева, амбасадорка во Словачка, и д-р Кирил Пенушлиски, куратор на изложбата, известија од „Архифакт“ – Скопје.