Српскиот културно-информативен центар „Спона“ го завршува циклусот книжевни средби и работилници „Паралели и синтези: Рецепцијата на современата македонска книжевност“, во којшто во фокусот беа дела од осум современи македонски автори што изминативе години се објавени и во Република Србија во превод на српски јазик.

Трибината со наслов „Остварувања и предизвици“ ќе се одржи на 11 декември, со почеток во 12 часот, во салонот „Империјал“ на Културно-информативниот центар – Скопје (КИЦ).

Модератор на трибината ќе биде Иван Антоновски, којшто ги модерираше и книжевните средби и работилници во рамките на проетот „Паралели и синтези“, а осврт на оствареното ќе даде и програмскиот директор на „Спона“, книжевникот Милутин Станчиќ.

Свое учество на настанот имаат најавено македонските автори: Венко Андоновски, Петар Андоновски, Давор Стојановски, Славе Ѓорѓо Димоски, Лилјана Пандева, Иван Џепароски и Фросина Пармаковска, како и новинарот Тони Димков, а свое учество како преведувач ќе земе и Сашо Огненовски.

Од Србија ќе учествуваат: Мирко Демиќ, Марица Гроздановиќ-Милошевиќ, Милутин Ѓуричковиќ и Јелена Макевиќ, лекторка по српски јазик на Филолошкиот факултет „Блаже Конески“ во Скопје.

На трибината ќе се отворат повеќе прашања за присуството на македонската книжевност во Србија и на српската во Македонија, начинот и квалитетот на пласирање на изданијата, одгласите на критиката, достапноста до читателите и нивниот интерес, како и за предизвиците во времето пред нас.

Во рамките на настанот ќе бидат изложени и плакати од циклусот книжевни средби и работилници „Паралели и синтези: Рецепцијата на современата македонска книжевност во Република Србија“.