Од ЈП „Комунална хигиена“ информираат дека во текот на минатата година, комуналците подигнале и транспортирале вкупно 21.995 кубни метри отпад од стотици диви депонии лоцирани во сите скопски општини. Од нив, најголемо количество непрописно одложен отпад е отстрането во скопските општини Центар и Чаир.

„Екипите на претпријатието речиси секојдневно интервенираа на неколку локации каде што се одлага отпад на јавни и на сообраќајни површини, најчесто на  булеварот Никола Карев (Пластичарска улица), на аголот со улицата Максут Садик, веднаш крај детското игралиште, каде што континуирано се отстрануваа големи количества непрописно одложен кабаст, градежен и мешан комунален отпад“, велат од „Комунална хигиена“.

Исто така, Еко-патролата на претпријатието лани врачила 607 записници за лица и правни субјекти затекнати при непрописно одлагање отпад, од кои најголем број записници – вкупно 227, се изготвени во скопската општина Чаир.

Оттаму посочија дека претпријатието нема ингеренции на терен да ги санкционира прекршителите на Законот за јавна чистота и токму поради тие причини апелираат што поскоро на сила да стапи Закон за формирање комунална полиција, кој според нив, е најефикасен начин за превенција на загадувањето на животната средина и заштитата на јавното здравје.