Лионел Меси ова лето објави дека сака да го напушти „Камп Ноу“, подоцна се предомисли, односно не сака да оди на суд со Барселона поради обесштетување.

Досега имаше само шпекулации, а сега е и официјално – доколку Аргентинецот навистина одлучи да се раздели со Барса, Манчестер сити веднаш ќе се обиде да го ангажира.

Ова го најави Омар Берада, шефот на фудбалските операции во англискиот клуб. Договорот на Меси со каталонската екипа истекува наредното лето:

– Сè зависи од него – доколку тој сака да замине, ние сме тука. Дефинитивно ќе се обидеме. Фактот што Сити беше спомнат како клуб достоен за Меси зборува за тоа колку сме направиле во изминатите години и што станавме во светот на фудбалот. Не е мала работа кога се зборува дека сме вистинскиот избор за најдобриот играч на светот – рече Берада.

Моментно според „Трансфермаркт“ Меси вреди 100 милиони евра, досега во новата сезона од „Ла Лига“ има три настапи за Барселона, со еден гол во домашниот триумф над Виљареал (4:0).