Двајцата пријатели од Холандија само сакале да видат што е толку фасцинантно за мистериозната „Област 51“ пред да ги напуштат Соединетите Американски Држави и да заминат во татковината, но тие завршиле во затворот на сојузната држава Невада, објави Си-ен-ен.

Тис Гранзиер (20) и Чарлс Џејкоб Свип (21) се уапсени откако минале речиси пет километри во забранетата зона во Невада, која е заштитена како Национална безбедносна зона, објавија од полицијата.

Локацијата во близина на „Областа 51“, која со декади е во фокусот на теориите на заговор. Многумина сметаат дека американската влада токму на оваа локација чува докази за постоењето на вонземјани и неидентификувани летечки објекти.

Дополнително, областа стана уште попозната, кога пред неколку месеци беше креиран Фејсбук-настан кој ги повикуваше луѓето да се соберат пред влезот на „Областа 51“ и директно да влезат внатре, и покрај силното обезбедување. Овој настан привлече огромно внимание на светско ниво, а во моментов дури 2,1 милиони луѓе кажале дека ќе одат на настанот кој е закажан за 20. септември.

Сепак, на момчињата од Холандија не им било цел да учествуваат во Фејсбук-настанот.

– Ние немавме никаква намера насилно да влегуваме, поради тоа што си одиме од САД пред закажаниот датум. Сакавме само да одиме таму, да видиме што има – изјавил Свип за КТНВ.

И покрај тоа што и двајцата Холанѓани знаеле да читаат, пишуваат и зборуваат англиски јазик, а притоа ги виделе знаците за забрана, сепак продолжиле со ризичното патување во забранетата област.

Кај Гранзиер се пронајдени камери, телефони, лаптоп и дрон, а тој им појаснил дека објавува содржини на Јутјуб. Тие првично биле осудени на една година затвор, но казната била суспендирана и двајцата ќе имат вкупно три дена во окружниот затвор доколку платат казна од 2.280 долари на денот кога треба да бидат ослободени.