Шпанските здравствени власти одлучија да дозволат фудбалските стадиони и останатите спортски објекти да бидат исполнети со 100 отсто од капацитетите, изјави министерската за здравство, Каролина Даријас.

Ограничувањата за присуство на навивачите на спортските натпревари целосно ќе бидат укинати на 4 март бидејќи последниот бран на пандемијата на коронавирусот и последната варијанта омикрон, полека стивнува.

Даријас напомена дека на сила ќе остане задолжителното носење на заштитни маски на стадионите, а ќе остане забраната и за пушење, за јадење и за пијалоци на трибините.

Сезоната во Ла Лига започна со дозвола капацитетите на стадионите да бидат исполнети до 60 отсто, по што во октомври беше дозволено 100 отсто, но со појавата на варијантата омикрон, беше дозволено на трибините да бидат исполнети 75 отсто од вкупниот капацитет.