Грузискиот репрезентативец Торнике Шенгелија изјави дека неговите соиграчи реагирале „машки“ при пресметката со турските кошаркари по натпреварот од третото коло од групата А на Европското првенство, во кој домаќинот во Тбилиси победи со 88:83 по две продолженија.

Турските медиуми објавија дека нивниот репрезентативец Фуркан Коркмаз по натпреварот бил нападнат од Дуда Санадзе, Шенгелија и Гого Битадзе.

Шенгелија не игра на ЕП поради повреда на рамото, додека Битадзе поради одлука на селекторот Илијас Зурос, не настапи против Турција.

– Не требаше да реагираме на провокации. Реагиравме како луѓе, како мажи и покажавме реакција. Од друга страна, кога ќе почне конфликтот на теренот, тој треба да остане таму. Не треба да барате играчите на другиот тим пред нивните семејства, пријатели и навивачи, да одат во тунелот и ја продолжат тепачката. Не е само тоа, кога отидовме во соблекувалната, турските кошаркари продолжија со провокациите. Не навредуваа со погрди имиња и со рацете ни покажуваа секакви работи. Турските медиуми исто така поинаку го презентираа тоа што се случуваше по натпреварот и тоа предизвика предизвика агресивни реакции на турските навивачи кон нашите семејства. Тоа се многу вознемирувачки пораки и ни се заканија со смрт – напиша Шенгелија на социјалните мрежи.

Од друга страна, турскиот репрезентативец Фуркан Коркмаз има поинаков став од тој на Грузеицот Шенгелија.

– Тоа беше како улична тепачка, немаше разговор, луѓето само не нападнаа. Секако дека реагиравме и се браневме, што моравме да го направиме како мажи. Мислам дека имаше и пропуст со обезбедувањето. Или можеби едноставно дозволија на нивните играчи да прават што сакаат – изјави Коркмаз за турските медиуми.