Севернокорејските војници накратко ја преминале „воената демаркациска линија“ (MDL), соопштија денес јужнокорејските воени претставници.

Според претставниците, војниците кои во тој момент работеле во област во близина на границата ја преминале MDL на југ, објави Јонхап.

Потоа јужнокорејската војска испратила предупредувачки пораки и испукала предупредувачки истрели, по што севернокорејските војници се повлекле на својата страна од границата.

„Постапивме во согласност со пропишаната постапка бидејќи имаше прекршување на договорот за примирје во демилитаризираната зона“, соопштија Здружените началници на Генералштабовите.

Не е познато колку севернокорејски војници ја преминале линијата или дали биле вооружени.

Инцидентот се случил во услови на недостаток на одговор од Северна Кореја на предлогот на Јужна Кореја за одржување воени разговори за намалување на ризикот од случајни судири по границата.

Министерството за одбрана во Сеул соопшти дека честите прекршувања на MDL веројатно се поврзани со оштетување и губење на граничните ознаки, кои во голема мера се ненадгледувани од 1973 година.

Севернокорејските војници ја преминале границата околу 10 пати од почетокот на годината, вклучувајќи го и инцидентот во октомври кога двајца војници накратко преминале во Југот додека барале дезертер.