Севернокорејскиот лидер Ким Џонг-ун изјави дека неговата земја „ја опремува морнарицата со нуклеарно оружје“, објавија државните медиуми, истовремено презентирајќи ги плановите за изградба на воени бродови од 10.000 тони, пренесе „Јапантајмас“.

Забелешките беа дадени за време на церемонијата на пуштање во употреба на воениот брод „Чое Хјон“, еден од двата воени брода од 5.000 тони што беа лансирани минатата година, во пристанишниот град Нампо, објави Корејската централна новинска агенција.

„Програмата за опремување на морнарицата со нуклеарно оружје напредува точно според планот. Тоа е стратешка насока од клучно значење бидејќи ќе им овозможи на нуклеарните сили на нашата земја да бидат подготвени за повеќекратни и ефикасни операции“, рече Ким на церемонијата.

Северна Кореја претходно изјави дека „Чое Хјон“ е опремен со „најмоќното оружје“, а Ким неколку пати годинава ги обиколи бродовите, вклучително и надгледувајќи го тестот на крстосувачка ракета испукана од „Чое Хјон“ во април годинава.

„По „Чое Хјон“, наскоро ќе го ставиме во оперативна употреба разорувачот „Канг Кон“. Потоа ќе лансираме стратешки воени бродови од 10.000 тони еден по друг“, рече севернокорејскиот лидер.

Според неговиот план, Северна Кореја треба „да гради два површински воени брода од класата „Чое Хјон“ секоја година, вклучувајќи и крстосувач од 10.000 тони“.

На тридневната пленарна седница на владејачката партија, која заврши во понеделникот, Ким вети дополнително зајакнување на одбранбените капацитети на земјата, посочувајќи дека напорите на Јужна Кореја и САД за модернизација на војската го туркаат регионот „до работ на нуклеарна војна“.

Од неуспешниот самит меѓу Ким и американскиот претседател Доналд Трамп во Ханој во 2019 година, Пјонгјанг постојано се прогласува за „неповратно“ нуклеарна држава. Самитот пропадна поради несогласувања околу обемот на денуклеаризацијата и укинувањето на санкциите.

Северна Кореја е под повеќекратни меѓународни санкции поради својата нуклеарна програма, а двете Кореи технички сè уште се во војна бидејќи конфликтот од 1950-53 година заврши со примирје, а не со мировен договор.

Америка го влошува крвопролевањето во Европа и на Блискиот Исток, обвини Ким Џонг Ун