Фудбалскиот сојуз на Босна и Херцеговина одлучи да се раздели со досегашниот селектор, Саво Милошевиќ, а прв кандидат за негов наследник е Сергеј Барбарез, соопшти порталот „Клик.ба“.

Милошевиќ не успеа со Босна да се пласира на Европското првенство што беше негова главна задача, па во Босна одлучија да не ја продолжат соработката.

Сергеј Барбарез засега е првиот фаворит да го наследи на селекторската позиција. Барбарез е икона на репрезентацијата на Босна и легендарен капитен, а во периодот од 1998. до 2006 година запиша 47 настапи и постигна 17 голови.

Играчката кариера ја започна во Вележ, а подоцна ја градеше кариерата во Германија каде што беше дел од: Унион Берлин, Ханса Рошток, Борусија Дортмунд, ХСВ и Баер Леверкузен. Своевремено беше еден од најдобрите напаѓачи во германската Бундеслига каде што во сезоната 2000/2001 беше најдобар стрелец.