Следниот пат кога ќе се сопнете, ќе кажете нешто погрешно или ќе направите мал социјален гаф, подобро е да се насмеете отколку да се повлечете од срам. Ново истражување покажува дека луѓето кои умеат да се пошегуваат на своја сметка оставаат подобар впечаток и делуваат попристапно, посигурно и поавтентично, пишува „Тајм“.

Кога станува збор за секојдневни, безопасни ситуации, искрената реакција и малку хумор можат целосно да ја променат атмосферата. Наместо непријатност, често доаѓа до поврзување со другите, бидејќи повеќето луѓе се препознаваат во вакви моменти.

Истражувањето, објавено во списанието „Журнал од персоналити енд соушал псајколоџи“, опфатило повеќе од 3.000 учесници кои оценувале како луѓето реагираат во непријатни ситуации. Резултатите покажале дека оние кои се смеат на сопствените грешки се перципираат како поотворени, посамоуверени и покомпетентни од оние кои реагираат со изразен срам.

Научниците објаснуваат дека смеата во вакви моменти сигнализира самоприфаќање, што е особина која луѓето ја доживуваат позитивно. Наместо да се фокусираме на тоа како нè гледаат другите, хуморот покажува дека сме свесни дека грешката е мала и не вреди за драматична реакција.

Од друга страна, претераниот срам за ситни гафови може да остави впечаток на несигурност или претерана загриженост за туѓото мислење. Клучот, велат експертите, е реакцијата да биде соодветна на ситуацијата.

Сепак, важно е да се направи разлика кога е соодветно да се смееме. Хуморот функционира само кога грешката е безопасна. Доколку некој е повреден или ситуацијата е сериозна, смеата може да делува нечуствително и да создаде негативен впечаток.

Психолозите советуваат дека во повеќето секојдневни ситуации ги преценуваме сопствените грешки. Другите луѓе обично им посветуваат многу помалку внимание отколку што мислиме, па токму затоа лесниот пристап и хуморот се често најдобрата реакција.

Едноставно е – наместо да се срамиме од малите незгоди, подобро е да ги прифатиме со насмевка. Така не само што ќе се чувствуваме подобро, туку и ќе оставиме попозитивен впечаток кај другите.