Оваа година се навршија четириест години од смртта на американската актерка Грејс Кели, која по венчавањето со кнезот на Монако, Рејнер III во 1956 година, стана кнегиња на Монако. Убавата филмска ѕвезда, која мораше да се откаже од својата актерска кариера поради љубовта, честопати беше нарекувана и „принцезата Грејс“ во јавноста.

Грејс Кели загина во сообраќајна несреќа на 14 септември 1982 година. По повод четириесетгодишнината од оваа трагедија, британскиот медиум „Мирор“ направи ексклузивно интервју со еден од најблиските пријатели на Кели, филмскиот режисер Роберт Дорнхелм.

Потсетувајќи се на нејзините незаборавни улоги во филмовите „Точно на пладне“, „Одбери У за убиство“ на легендарниот режисер Алфред Хичкок и „Провинцијалка“ за кој ја доби филмската награда Оскар за најдобра женска улога, Дорнхелм сподели неколку помалку познати факти од животот на Кели.

Со оглед на тоа што Кели имала ирско потекло, таа поседувала мала викендица во близина на Корк и тајно копнеела за мирен живот во Ирска, татковината на нејзините предци. Дорнхелм тврди дека Кели не сакала да биде позната, туку сонувала да „потоне во мрак“.

„Таа копнееше да прошета низ Париз без никој да ја препознае, во суштина беше обична жена која сонуваше за поедноставен живот. Сакаше да биде невидлива, да биде со обични луѓе, да оди во ресторани и пабови. Ова го правевме повремено додека живееше во Париз, тогаш ја познавав, и секогаш беше многу горда што никој не ја препознава и дека може да биде нормална. Тоа не беше нејзината грижа, тоа беше нејзината надеж“, раскажува Дорнхелм.

„Сакаше да заврши во Корк. Таа беше тотален романтичар и голем сонувач. Мислам дека Ирска добро ќе ѝ одговараше. Но, во исто време, начинот на кој се одвиваше нејзиниот живот беше како бајка. Нејзиниот живот не можеше да заврши на некој обичен начин – едноставно да исчезне, а никој да не примети. Едноставно, таа беше родена за да биде посебна и да нема секојдневен живот“, вели 74-годишниот австриски режисер.

Дорнхелм ја запознал Кели во 1977 година, кога тој имал 30, а таа 48 години.

„Грејс беше прекрасна и едноставна, многу директна. Првото нешто што го кажа беше: ‘Не ми се обраќајте со Ваше Височество, обраќајте ми се со Грејс’. Таа беше многу нормална. Многу едноставна и некомплицирана. Таа блескаше, никој не можеше да го тргне погледот од неа. Кога ќе пристигнеше некаде, таа веднаш беше забележана“, сподели тој.

Дорнхелм вели дека Кели била многу смешна и духовита, сосема спротивно од описот кој ѝ го препишувале – „ледена русокоса“.

“Таа сакаше да пие, да танцува и да биде нормална. Немаше ништо студено во неа. Направи да се чувствувам посебно и ценето. Бев на почетокот на мојата кариера и таа уживаше во мојата работа. Го искористивме документарецот ‘Децата на театарската улица’ за промовирање стипендии за талентирани деца. Бевме на многу премиери ширум Европа“, тврди режисерот.