Американските имиграциски власти планираат в неделата да започнат голема акција на депортирање на неодамна дојдените семејства, кои нелегално пристигнале во САД, објави „Вашингтон пост”, цитирајќи три неименувани американски официјални претставници.

Се очекува дека операцијата да биде насочена кон околу 2000 семејства, на кои им е издадена наредба за депортација во околу 10 американски градови, вклучувајќи ги и Хјустон, Чикаго, Мајами и Лос Анџелес.

Портпаролот на американската служба за имиграција и царина одби да коментира, велејќи: „Поради чувствителноста на спроведувањето на законот и безбедноста и заштитата на членовите на американската служба за имиграција и царина, агенцијата нема да објави детали поврзани со операциите пред завршувањето на овие акции”.

Бројот на мигранти уапсени при преминувањето на границата меѓу САД и Мексико нагло се зголеми во мај на највисоко ниво од 2006 година, од кои многу семејства бегаат од сиромаштијата во Централна Америка.

Покрај тоа, гувернерот на Тексас рече дека федералната држава ќе распореди 1000 војници на националната гарда на граница, откако над 45.000 луѓе беа уапсени при нелегално преминување во текот на изминатите три недели.