Двајца Руси лажно се претставиле како новоизбраниот украински претседател Володимир Зеленски, а потоа телефонски разговарале дури и со со францускиот претседател Емануел Макрон, по неделните избори во Украина.

Руските шегобијци, познати како Вован и Лексус го побарале Макрон, а еден од нив се претставил како новиот украински претседател Зеленски.

На аудио снимка од 15-минутен  разговор поставен денеска на Јутјуб се слуша како наводно Макрон му ја честита победата на Зеленски и му посакува да ужива во победата на претседателските избори во кругот на најблиските и семејството.

– Многу Ви благодарам за поддршката, со 73 отсто се чувствувам како Владимир Путин, тој има исти такви резултати – се пошегувал лажниот Зеленски.

Глас сличен на Макрон возвратил на шега дека постои барем една разлика со Русија, „се уште сите свои противници не сте ги испратиле в затвор“, одговорил францускиот претседател.