Рускиот функционер и раководител на преговорите, Владимир Медински, го информираше претседателот Путин дека руската страна го пренела ставот на Кремљ и дека е можна средба на ниво на шефови на држави.

„Таква средба мора да биде подготвена“, додаде тој, сугерирајќи дека Москва можеби работи на планови за претстојна средба меѓу лидерите.

Во исто време, шефот на руската делегација изјави дека Киев предлага безусловно примирје во траење од 30 до 60 дена.

Медински го информираше рускиот претседател дека е во тек план за размена на приближно 1.200 воени заробеници од секоја страна, откривајќи истовремено дека Русија работи на враќање на 339 деца во Украина, кои, како што рече, биле „спасени од руски војници“.

Медински, како заклучок, пренесе дека во врска со други прашања од разговорите, „топката за преостанатите прашања е во дворот на Украина“.

Рускиот министер за надворешни работи Сергеј Лавров потврди дека директните разговори функционираат, истакнувајќи дека „двете рунди донесоа конкретни резултати“ и ја нагласи важноста од одржување на каналите за комуникација, и покрај „предизвиците“.

Сепак, тој го критикуваше Зеленски за неговото одбивање да прифати неколкудневна пауза за собирање на мртвите војници.

Исто така, Сергеј Лавров изјави дека Русија не треба да подлегне на „криминалните провокации“ на Украина, туку да користи преговори и сите расположиви средства за да ги постигне целите на воената операција.

Одговорот на рускиот претседател на изјавите на Лавров беше позитивен, и тој наведе дека се согласува со ова.

Украина зад експлозиите на мостовите

Шефот на рускиот Истражен комитет, Александар Бастрикин, во среда изјави дека украинските безбедносни служби се одговорни за бомбашките напади на мостовите минатиот викенд во регионите Брјанск и Курск, кои ги опиша како терористички акти.

Според Бастрикин, во нападите загинале седум лица, а 115 биле повредени, додека тој известил дека механизмите за контрола на експлозиви биле произведени во Украина, а експлозивите биле од странско потекло.

Киев досега не ги коментираше обвинувањата за напади врз железничката инфраструктура.