Владата ќе преземе мерки доколку анализите покажат дека одредени трговци неосновано ги зголемиле маржите на производите, најави заменик-министерот за економија Марјан Ристески. Тој посочи дека прво ќе следуваат разговори со компаниите за да се утврдат причините за евентуалните зголемувања, а доколку се утврди дека нема реално оправдување, институциите ќе реагираат со соодветни мерки.

-Онаму каде што ќе потврдиме дека има повисоки маржи, првин ќе разговараме со субјектите и ќе видиме која е причината за зголемувањето. Ако утврдиме дека тоа не е основано, ќе преземеме одредени мерки – конкретно кон нив или пошироки мерки- изјави Ристески.

Тој нагласи дека Владата не планира директно ограничување на цените, туку смета дека пазарните механизми треба да имаат главна улога во формирањето на цените.

-Работиме во услови на пазарна економија. Понудата и побарувачката треба да ги регулираат цените, но таму каде што нема пазарна логика во зголемувањето на цените и маржите, ќе реагираме- рече заменик-министерот.

Според него, целта е да се спречи создавање дополнителни профити на сметка на граѓаните, особено во услови на економска и енергетска криза.

Ристески додаде дека Министерството постојано комуницира со трговците, производителите, увозниците и стопанските комори, а сите податоци од Пазарниот инспекторат се анализираат заедно со Владата.

-Имаме една од најниските инфлации во регионот и со мерките што ги спроведовме успеавме да го заштитиме животниот стандард колку што е можно повеќе, без да нанесеме штета на приватниот сектор и економијата- истакна тој.

Заменик-министерот вели дека граѓаните најдиректно ги чувствуваат крајните цени во продавниците, но посочи дека економските политики мора да бидат внимателно балансирани за да се зачува и куповната моќ на населението и стабилноста на стопанството.

Ацо Ристов ја презеде функцијата претседател на Регулаторната комисија за енергетика