Реномирани гости ќе настапат на вториот Меѓународен фестивал за современа музика во Штип
Музичката академија при Универзитетот „Гоце Делчев“ го најавува второто издание на Меѓународниот фестивал за современа музика, што ќе се одржи од 27 мај до 3 јуни во Штип.
Препорачано
Фестивалот предвидува концерти на многу познати светски имиња од различни држави, а воедно и мастер-класи кои овие врвни уметници ќе ги одржат за студентите од Музичката академија.
– Ова е одлична можност за студентите да се запознаат со врвни уметници од современата музика, а воедно и да договорат идни соработки и проекти заедно со нив. Ова е второ издание на фестивалот, кое треба да ќе прерасне во долгогодишна традиција – истакнуваат од Музичката академија при УГД.
Фестивалот ќе почне на 27 мај со настап на реномираниот чешки кларинетист Карел Дохнал со нашата позната пијанистка Наташа Трбојевиќ. На 28 мај настапува познатата флејтистка од Србија, Ангела Братиќ, со пијанистката Наташа Трбојевиќ, а на 29 мај гостува турската пијанистка Ширин Акбулут Демири заедно со нашата позната пијанистка и професор на Музичката академија, Милица Шкариќ.
Фестивалот ќе заврши на 3 јуни со настап на најдобрите студенти од Музичката академија. Концертите ќе се одржат во Уметничката галерија „Безистен“, со почеток од 19 часот. Влезот е слободен.
