Редовното будење во текот на ноќта и одењето во тоалет за мокрење може да укажува на сериозни здравствени проблеми. Освен што го прекинувате сонот и мора да станете од топлиот кревет, што често резултира со дневен замор, честите ноќни одења во тоалет не треба да се занемаруваат ниту да се прифаќаат како нешто нормално. Тие можат да бидат знак за одредени заболувања, па затоа е важно за ова да разговарате со вашиот лекар. Ова се четири медицински причини кои може да стојат зад честото ноќно мокрење, пишува „Живим“.

Дијабетес

Дијабетесот е сериозна и хронична болест која предизвикува зголемено ниво на шеќер во крвта, а еден од клучните симптоми е зачестениот нагон за мокрење. Овој нагон, познат како полиурија, може да биде резултат на обидот на организмот да го исфрли вишокот гликоза. Исто така, може да се јави и поради зголемен внес на течности, како последица на силната жед, која е уште еден типичен симптом на дијабетесот. Американскиот Центар за контрола и превенција на болести укажува дека честото ноќно мокрење може да биде предупредувачки знак за дијабетес. Други можни симптоми се постојана жед, изразен замор, ненамерно слабеење, чешање во гениталната регија или чести габични инфекции, бавно зараснување на рани и слабеење на видот.

Рак на простата

Во рана фаза, ракот на простата често поминува без јасни симптоми, што го прави особено опасен. Сепак, доколку туморот е доволно голем за да ја притиска уретрата, може да се појават одредени тегоби, меѓу кои и зачестено мокрење, најчесто ноќе. Други предупредувачки знаци се ненадеен и силен нагон за мокрење, отежнат почеток на мокрењето, напнување или продолжено мокрење, ослабен млаз на урина, чувство дека мочниот меур не е целосно испразнет, како и појава на крв во урината или семената течност. Сепак, овие симптоми не мора нужно да значат рак на простата. Кај многу мажи со годините се јавува бенигно зголемување на простатата, кое може да предизвика слични симптоми. Во секој случај, доколку ги забележите овие промени, потребно е да се обратите кај лекар.

Инфекции на уринарниот тракт

Станува збор за инфекции кои го зафаќаат уринарниот систем, вклучувајќи го мочниот меур, уретрата и бубрезите. Тие најчесто се лекуваат со антибиотици, иако антибиотска терапија не е секогаш неопходна. Типичен симптом на инфекциите на уринарниот тракт е потребата за почесто празнење на мочниот меур, особено во текот на ноќта.

Други симптоми се болка и печење при мокрење, зголемена учестеност на мокрењето, ненадеен и итен нагон за мокрење, заматена урина, присуство на крв во урината, болка во долниот дел на стомакот или во грбот под ребрата, како и висока температура или, поретко, многу ниска температура под 36 степени.

Изразен мирис и темна боја на урината исто така можат да бидат знак на инфекција, но доколку тоа е единствениот симптом, можно е да се работи за недоволен внес на течности.

Проблеми со бубрезите

Многу луѓе не се свесни дека имаат хронична бубрежна болест сè додека таа не премине во понапредна фаза. Ова заболување може да предизвика зголемена потреба за мокрење, особено ноќе. Други симптоми се губење на телесна тежина и намален апетит, отечени зглобови, стапала и дланки поради задржување течности, краток здив, замор, крв во урината, несоница, чешање на кожата, мускулни грчеви, мачнина, главоболки и еректилна дисфункција кај мажите. Доколку забележите еден или повеќе од овие симптоми, потребно е што побрзо да се обратите кај лекар, бидејќи тие можат да укажуваат и на откажување на бубрезите, состојба која може да бара дијализа или дури и трансплантација на бубрег.